18:12, 30 қыркүйек 2025
«Қайрат» футбол клубының баспасөз қызметі бүгін, 2025 жылғы 30 қыркүйекте Алматыдағы Орталық стадионда өтетін тарихи «Қайрат» – «Реал Мадрид» матчы кезінде жанкүйерлерді не күтіп тұрғанын айтып, оларға арнайы үндеу жасады, деп хабарлайды Zakon.kz.
Клуб барлық көрерменді матч басталардан 3-4 сағат бұрын стадионға келуге шақырды.
«Бұл стадионға кіреберістегі тексеріс пен бақылаудан өтуге, кезек пен ыңғайсыздықтың алдын алуға көмектеседі. Билетіңіз бен куәлік деректеріңізді алдын ала дайындап қойыңыздар. Матч 21:45-те басталады. Бізбен бірге бұл тарихи сәттің куәсі болыңыздар!» — делінген «Қайрат» ФК баспасөз қызметінің хабарламасында.
Жанкүйерлер стадион аумағына 17:45-тен бастап кіре алады.
Дәл осы уақытта ойын алдындағы бағдарлама басталады:
- УЕФА мен клуб серіктестерінің интерактив аймақтары;
- көңілді барабаншылар шоуы;
- жанкүйерлерге арналған тегін аквагрим;
- фудкорттағы дәмді тағамдар мен сусындар;
- трибунада клуб жалауларын тарату.