Алматыда көпқабатты үйдің үшінші қабатынан сарбаз секіріп түсті. Ол тірі қалып, ауруханаға жеткізілді, деп хабарлайды Zakon.kz.
ҚР Ұлттық ұланының «Оңтүстік» өңірлік қолбасшылығының баспасөз қызметі хабарлағандай, №5571 әскери бөлімінде қызмет етіп жүрген сарбаз қатты күйзеліске түскен.
«2025 жылдың 4 қазанында зардап шеккен сарбаз Алматы қаласындағы Жедел жәрдем ауруханасына жеткізілді. Қазір оған қажетті медициналық көмек көрсетіліп жатыр. Қызмет барысында дәрігерлер сарбазға “бейімделу бұзылысы” деген диагноз қойған — ол әскерге шақыртылмай тұрып жақын туысын жоғалтқан және қызметін жалғастыруға жарамдылығын анықтайтын әскери-дәрігерлік комиссияның шешімін күтіп жүрген», — делінген хабарламада.
Ұлттық ұлан өкілдері бейнебақылау камераларындағы жазбаларда бөгде адамның араласқаны анықталмағанын атап өтті.
Қазір қызметтік тексеріс тағайындалып, оқиғаның мән-жайы анықталып жатыр.
Айта кетейік, 30 қыркүйекте Қорғаныс министрлігі сарбазға жасалған «қорлық» туралы тараған видеоны түсіндіріп, оның «Баткен» көркем фильмінен алынған үзінді екенін хабарлаған болатын.