17:56, 30 сәуір 2025
Синоптиктер алдағы 2025 жылғы 1 мамырда, мереке күні Қазақстанда ауа райы қандай болатынын айтты, деп хабарлайды Zakon.kz.
«Қазгидромет» РМК деректері бойынша, Қазақстан халықтарының бірлігі күні жауын-шашынсыз ауа райы тек еліміздің солтүстігі мен орталығында ғана күтіледі.
«Қазақстанның басым бөлігінде ауа райына атмосфералық бөліктердің жылжуы әсер етеді, осыған байланысты найзағай ойнап, жаңбыр жауады, түнде оңтүстік-шығыстың таулы аймақтарында жауын-шашын (жаңбыр, қар) болып, еліміздің батысы мен оңтүстік-шығысында бұршақ жаууы да мүмкін… Республикамыз бойынша ортақ табиғи құбылыс ретінде желдің күшеюін айтуға болады, оңтүстік-шығыста шаңды дауыл тұрса, түнде және таңертең тұман болады деп болжанады», делінген болжамда.
Сондай-ақ, күннің күрт суытатыны да болжануда.
«Қостанай облысының батысында, шығысында, Ұлытау облысының солтүстігінде, шығысында, Қарағанды, Шығыс Қазақстан облыстарында, Ақмола облысының батысында, оңтүстігінде, шығысында, Солтүстік Қазақстан облысының оңтүстік-шығысында, Павлодар облысының батысында, оңтүстігінде, батысында, Абай облысының солтүстігінде күн суып, сынап бағаны -1-4°C суықты көрсетеді. Ақтөбе облысының шығысында топырақ беті қатып, сынап бағаны -1°C суықты көрсетеді деп күтіледі». «Қазгидромет» РМК
Сонымен қатар Алматы қаласының орталығында, Атырау, Ақтөбе, Қарағанды, Шығыс Қазақстан облыстарының оңтүстігінде, солтүстік-шығысында, шығысында, Маңғыстау облысының орталығында, Ұлытау облысының орталығында, батысында, Жетісу облысының оңтүстігінде, солтүстік-батысында, Абай облысының оңтүстігінде жоғары өрт қаупі күтілуде.
«Алдағы екі тәулікте республикамыздың оңтүстігі мен оңтүстік-шығысындағы таулы өзендерде судың тасу қаупі байқалатын болады. Есіл өзенінде (СҚО) су деңгейінің көтерілу қаупі жоғары», делінген гидрологиялық болжамда.
Бұған дейін синоптиктер еліміз бойынша алдағы күндері: 2025 жылдың 1, 2 және 3 мамырына арналған ауа райы болжамымен бөліскен болатын.