Әлемге танымал қазақстандық әнші Димаш Құдайберген жанкүйерлерінің бірімен жеке кездесуге уәде беріп, ол үшін не істеу керектігін айтып берді, деп хабарлайды Zakon.kz.
ҚР Халық әртісі 2026 жылғы 3 ақпанда өзінің Instagram парақшасында ерекше челлендж бастайтынын жариялады.
«Достар, жобамыздың премьерасы жақындады. Осыған орай, қызық болсын деген ниетпен кішігірім челлендж бастаймын. Достарыңызды @voicebeyondhorizon парақшасына шақыру керек және шақырылған адам міндетті түрде @voicebeyondhorizon парақшасына тіркелуі тиіс. Ең көп тіркелуші алып келген адаммен жеке кездесіп, құрметті қонақ қылдырып, бір күн бірге өткізсек деймін. Қаласаңыздыр жеңімпаздың қаласына немесе еліне өзім барып келуге де дайынмын»,- деп мәлімдеді Димаш.
Белгілі болғандай, челлендж 3 ақпан мен 20 ақпан аралығында өтеді.
«Таныстарыңызды дәл осы видеоның астына тіркеп, шақыра берсеңіздер болады»,- деп қорытындылады әнші.
Бұған дейін Димаш Құдайберген өзінің жаңа жобасы жайлы егжей-тегжейлі айтып бергенін жазғанбыз.