19:11, 18 қыркүйек 2025
Синоптиктер Қазақстан бойынша алдағы жұма, 2025 жылғы 19 қыркүйекке арналған ауа райына болжам ұсынды, деп хабарлайды Zakon.kz.
Болжамға бойынша, түнде Қостанай облысының солтүстігі мен шығысында топырақ бетінде -2°C-қа дейін үсік күтіледі.
«Қазақстан аумағының басым бөлігі әлі де оңтүстік циклонның ықпалында болады. Соған байланысты найзағай ойнап, жаңбыр жауады, солтүстік-шығыста қатты жаңбыр болжанады. Сондай-ақ солтүстік-шығыс пен орталықта бұршақ жаууы мүмкін, дауыл тұрады. Республика бойынша желдің күшеюі күтіледі, ал солтүстікте, шығыста, оңтүстік-шығыста және орталықта түнде және таңертең тұман түседі», — деп мәлімдеді «Қазгидромет» РМК баспасөз қызметі.
Тек батыста, солтүстік-батыста және оңтүстікте солтүстік-батыс антициклонының ықпалымен жауын-шашынсыз ауа райы болжанып отыр.
Сонымен қатар Қазақстанның бірқатар өңірінде өрт қаупі сақталады:
- Жоғары өрт қаупі – Жетісу облысында, Батыс Қазақстан облысының солтүстігінде, Ақтөбе облысының солтүстігінде, Маңғыстау облысының оңтүстігінде, Қостанай облысында;
- Өте жоғары өрт қаупі – Түркістан, Қызылорда, Атырау облыстарында; Жамбыл облысының батысы, солтүстігі мен орталығында; Маңғыстау облысының солтүстік-батысы мен оңтүстік-шығысында; Батыс Қазақстан облысының батысы, оңтүстігі мен шығысында; Қарағанды облысының оңтүстігінде; Ұлытау облысында; Ақтөбе облысының батысы, солтүстік-шығысы мен орталығында; Алматы облысының солтүстігі мен шығысында; Жетісу облысында.